Дзмітрый Цітоў – выпускнік Беларускай дзяржаўнай акадэміі музыкі. З 2017 года з’яўляецца салістам канцэртна-гастрольнага аддзела Белдзяржфілармоніі.
Гэта малады выканаўца на домры і мандаліне, які вядомы ў музычных колах як у Беларусі, гэтак і за яе межамі. Прыродная музычнасць і сур’ёзнае дачыненне да сваёй прафесіі робіць яго яркім артыстам, здольным захапіць аўдыторыю непасрэднасцю свайго выканання.
Дзмітрый з’яўляецца лаўрэатам спецыяльнага фонду Прэзідэнта Рэспублікі Беларусь па падтрымцы таленавітай моладзі, а таксама лаўрэатам і дыпламантам прэстыжных рэспубліканскіх і міжнародных конкурсаў, у тым ліку VI Міжнароднага конкурсу маладых выканаўцаў на народных інструментах “Залатая лiра Палесся” (Гомель, 2018; I прэмія), Х Расійскага конкурсу імя С.В.Рахманінава (Вялікі Ноўгарад, 2011; I прэмія), VII Міжнароднага конкурсу юных выканаўцаў на народных інструментах імя В.В.Андрэева (Санкт-Пецярбург, 2012; III прэмія), III Міжнароднага конкурсу выканаўцаў на народных інструментах імя С.Сайдашава (Казань, 2014; II прэмія), ХVII Міжнароднага конкурсу выканаўцаў на народных інструментах імя А.Л.Рэпнікава (Петразаводск, 2015; I прэмія), I Усерасійскага Адкрытага конкурсу імя А.Б.Шалава (Санкт-Пецярбург, 2015; дыпламант I ступені), Міжнароднага конкурсу імя Я.Кувахары для мандаліны-сола (Швайнфурт, Германія, 2018; дыпламант).
Дзмітрый Цітоў выступае на канцэртных пляцоўках Польшчы, Эстоніі, Германіі, Славеніі, Італіі, Чэхіі.
З’яўляецца арганізатарам творчага музычна-асветніцкага праекта “Folk Strings”, стварэнне якога мае вялікі патэнцыял і значэнне для станаўлення беларускага домрава-мандаліннага выканальніцтва.
Выступае ў якасці ўдзельніка і саліста неапалітанскага мандалінна-гітарнага аркестра “Экспрэсія”.
Дзмітрый супрацоўнічае з такімі музыкантамі, як Рыкарда Сандавал (Венесуэла–Францыя), Маціяс Калэт (Францыя), Каці Ласо (Калумбія), Вінсэнт Бір-Дэмандэр (Францыя), Сабіна Марзе-Валі (Францыя), Наталля Корсак (Беларусь–Францыя). Прымаў актыўны ўдзел у запісах CD-дыскаў з сачыненнямі нямецкіх кампазітараў Герберта Баўмана і Эльке Тобер-Фогт.
