Канцэрт сімфанічнай музыкі
“КІТАЙСКІ НОВЫ ГОД”
Дзяржаўны акадэмічны сімфанічны аркестр Рэспублікі Беларусь
Галоўны дырыжор – народны артыст Беларусі Аляксандр Анісімаў
Музычны ансамбль “Хуасін”
Дырыжор – Юрый Караваеў
***
2 лютага 2024 года ў Вялікай канцэртнай зале Беларускай дзяржаўнай філармоніі пры падтрымцы Амбасады Кітайскай Народнай Рэспублікі ў Рэспубліцы Беларусь, Асацыяцыі арганізацый кітайскіх суайчыннікаў “Хуацяо” і Кітайскага культурнага цэнтра ў Мінску адбудзецца святочны канцэрт “Кітайскі Новы год 2024”, прысвечаны Святу вясны – аднаму з самых важных святаў у кітайскай культуры, які сімвалізуе ўз’яднанне, гармонію і прыгажосць.
У гэты вечар гледачы змогуць нацешыцца ўнікальным зачараваннем кітайскай культуры і святочнай атмасферай Кітайскага новага года. У радаснай і гарманічнай абстаноўцы кітайскія суайчыннікі ў Беларусі адчуюць цяпло хатняга агменю, а беларуская аўдыторыя адчуе багацце і магію кітайскай культурнай спадчыны.
Музыка – універсальная мова, што пераадольвае тэрытарыйныя межы, моўныя і культурныя бар’еры і пранікае ў самыя сэрцы людзей. Правядзенне падобнага роду імпрэз спрыяе ўмацаванню сяброўства і паразумення паміж народамі дзвюх краін і з’яўляецца выдатнай платформай для лепшага разумення кітайскай культуры і традыцый.
У выкананні Дзяржаўнага акадэмічнага сімфанічнага аркестра Рэспублікі Беларусь пад кіраўніцтвам дырыжора Юрыя Караваева і кітайскага музычнага ансамбля “ХУАСІН” прагучаць традыцыйныя кітайскія мелодыі, шэдэўры сусветнага музычнага мастацтва і творы беларускіх кампазітараў.
Чакаем вас на нашым канцэрце!
