Білетная каса:

+375 17 331-16-17

Замаўленне квіткоў

“BEL-LA-ITALIA”: Юбілейны канцэрт у год італьянскай культуры ў Беларусі

Дата: 05.12.2017 пачатак у 19:00
Катэгорыя: Вакал
Год італьянскай культуры ў Беларусі
Да 25-годдзя ўстанаўлення
беларуска-італьянскіх дыпламатычных адносін
Юбілейны канцэрт
Пры падтрымцы Амбасады Італьянскай Рэспублікі
ў Рэспубліцы Беларусь
“BEL - LA - ITALIA”
Заслужаны калектыў Рэспублікі Беларусь
Дзяржаўны камерны хор Рэспублікі Беларусь
Мастацкі кіраўнік і дырыжор –
заслужаная артыстка Рэспублікі Беларусь Наталля Міхайлава
Сімфанічны аркестр “CAPPELLA ACCADEMIA”
Аўтар праекта і дырыжор –
лаўрэат міжнародных конкурсаў Аляксей Фралоў
Салісты – лаўрэаты міжнародных конкурсаў
Таццяна Гаўрылава сапрана
Наталля Акініна меца-сапрана
Аляксандр Міхнюк тэнар
Ілья Сільчукоў барытон
Музыказнаўчы каментар –
кандыдат мастацтвазнаўства Святлена Немагай

“Беларуска-італьянскія культурныя сувязі маюць глыбокія карані і даўнюю гісторыю. Многія сотні гадоў кантакты нашых народаў давалі плённыя вынікі для нацыянальных культур і еўрапейскай культуры ў цэлым. Дзяржава Ватыкан і Венецыянская Рэспубліка ўжо ў глыбокім Сярэднявеччы кантактавалі і асвятлялі нашыя землі цывілізацыйнымі промнямі. Асабліва гэтыя працэсы ўзаемадзейнасці нашых народаў і культур узмацніліся ў эпоху Рэнэсанса, калі пачаліся актыўныя вандраванні еўрапейцаў па кантыненце, у тым ліку італьянцаў у Беларусь і беларусаў у Італію. Найярчэйшымі прыкладамі тых кантактаў былі – вучоба і атрыманне двух доктарскіх ступеняў у Падуанскім універсітэце будучым беларускім першадрукаром Францішкам Скарынам, візіты ў Італію і Ватыкан знакамітага паэта-лацініста Міколы Гусоўскага, легендарная вандроўка славутага магната, фундатара маштабных культурных ініцыятываў, князя Мікалая Крыштафа Радзівіла Сіроткі.

У сваю чаргу ў Беларусь (ВКЛ) прыязджалі італьянскія славутасці, самая выдатная з якіх – прадстаўніца знакамітага арыстакратычнага роду Бона Сфорца, што стала нашай вялікай князёўнай, жонкай манарха, а разам з тым – галоўным правадніком рэнесансных культурных і цывілізацыйных праяваў. Кампазітары і лютністы Рэнесанса і Барока – Мікелянджэло і Вінчэнца Галілеі, Дыямедас Като, капэльмайстар Джавані Баціста Качола, архітэктар Джавані Марыя Бернардоні – першыя вялікія італьянскія таленты, што пакінулі яркія сляды на беларускіх землях. Наступныя эпохі толькі пашыралі моду на “італьянскае” і спіс такіх талентаў – капэльмайстры і кампазітары Джаакіна Альберціні і Джавані Паізіэла, архітэктары Юзаф Фантана і Карл Спампані ды іншыя упрыгожвалі Беларусь сваімі шэдэўрамі.

Наша славутае 500 годдзе сёлета – выдатная нагода узгадаць пра шматвяковае і плённае супрацоўніцтва нашых народаў. Тым больш, што ў 2017-м спаўняецца 25 гадоў устанаўлення сучасных беларуска-італьянскіх дыпламатычных адносінаў.

Святочная канцэртная праграма сёння складзена як панарама італьянскіх шэдэўраў у рэтраспекцыі эпох. Яна – панарама – раскрываецца паміж двума вяршынямі: Музыкі МОНТЭВЭРДЗІ ў 16 ст. і “проста” ВЭРДЗІ ў 19 стагоддзі. Наш італьянскі “гукавы вітраж” складзены з ШЭДЭЎРАЎ свецкай і духоўнай кампаненты, аздоблены любімымі класічнымі “хітамі” і некалькімі ПРЭМ’ЕРАМІ: італьянскімі і беларускімі, звязанымі з Італіяй”.

Аляксей Фралоў

У праграме:
І аддзяленне
К.Мантэвэрдзі – Канцона
В.Галілеі – “In exit Israel”
А.Банкьеры – Чатыры мадрыгалы
“Сшытак Сапегі” і “Сшытак Хадкевіча”
Дж.Габрыэлі – Саната XXI для трох скрыпак і баса
А.Вівальдзі – Уверцюра-сімфонія да оперы “Канарацыя Дарыя” (Прэм’ера ў Беларусі)
Дж.Б.Пергалезі – “Stabat mater” (фрагменты)
М.Кл.Агінскі – Паланэз ля мінор “Развітанне з Радзімай”
Дж.Альберціні – Сімфонія in Dis (Прэм’ера архіўнай знаходкі прафесара В.У.Дадзіёмавай)
Дж.Паізіэла – Уверцюра да оперы “Служанка-гаспадыня”
ІІ аддзяленне
Дж.Вэрдзі – Уверцюра да оперы “Моц наканавання”
Г.Данiцэцi – Раманс Немарына з оперы “Любоўны напой”
Г.Данiцэцi – Раманс Малатэста з оперы “Дон Паскуале”
В.Беліні – Каваціна Нормы з оперы “Норма”
Дж.Пучынi – Aрыя Мiкеле з оперы “Плашч” (Прэм’ера ў Беларусі)
Неапалітанская песня “О, маё сонца”
Дж.Расiнi – Каватына Фiгара з оперы “Севільскі цырульнік”
Дж.Расiнi – Арыя альта і хор з “Урачыстай Маленькай месы”
Дж.Вэрдзі – Хор з оперы “Набука”
"BEL-LA-ITALIA": Юбилейный концерт в год итальянской культуры в Беларуси