НАВАГОДНІ МЮЗІКЛ-БАЛЕТ ДЛЯ ДЗЯЦЕЙ І ДАРОСЛЫХ “ШЧАЎКУНОК”
Ёсць краіна, у якую хацеў бы трапіць кожны. Краіна, у якой адважнасць і смеласць патрабуецца толькі тады, калі трэба выбраць паміж марцыпанам і шакаладам. Краіна, якая, бясспрэчна, існуе недзе зусім поруч з намі: толькі заплюшчыць вочы, і … кранальны Шчаўкунок, надзейны правадыр у свет мрояў, даставіць нас непасрэдна ў сталіцу – Цукеркенбург.
Казка пра Шчаўкунка даўно стала самай папулярнай зімовай гісторыяй, бо кожнае-кожнае дзіцё (нават калі яно даўно ўжо сталае) павінна абавязкова ў калядныя дні трапіць у гэту цудоўную атмасферу густаў, фарбаў і гукаў.
І ўсё ж, наша гісторыя – у незвычайнай абгортцы. Не драматычны спектакль і не класічны балет, а сапраўдная феерыя – харэаграфічны мюзікл! Класічная, усімі любая, музыка П.Чайкоўскага – але ў новых, сучасных, аранжоўках. Знаёмыя танцы – але ў новай, нечаканай харэаграфіі. Традыцыйныя персанажы – але ў новай кампаніі!
Мюзікл-балет выконваецца сіламі артыстаў Дзяржаўнага акадэмічнага ансамбля танца Беларусі, апроч музыкі П.Чайкоўскага ў сучасным аранжаванні гучаць песні, створаныя для казкі, і размоўныя сцэны, агучаныя артыстамі беларускіх тэатраў, ансамблем “Камерата” і ансамблем “Песняры”.
Дзяцей усіх узростаў чакае сустрэча з героямі казкі Э.Т.Гофмана ў аўтарскай версіі Валянціна Дудкевіча. Запрашаем гледачоў адправіцца ў казачнае падарожжа ў горад радасці.
Рэжысёр-пастаноўшчык, аўтар сцэнара і лібрэта – народны артыст Беларусі Валянцін Дудкевіч
Аўтар аранжаванняў – Арцём Фралоў
НАЙБЛІЖЭЙШЫЯ ІМПРЭЗЫ:
27 снежня (пт) 2024 года, 14.00
28 снежня (сб) 2024 года, 14.00
29 снежня (нд) 2024 года, 14.00
31 снежня (аўт) 2024 года, 13.00
02 студзеня (чц) 2025 года, 14.00
02 студзеня (чц) 2025 года, 17.00
03 студзеня (пт) 2025 года, 11.00
