А.Друкт – “Гарэзлівыя прыпеўкі”
У.Кур’ян – Канцэрціна
Н.Паганіні – “Венецыянскі карнавал”
Ж.-Ф.Рамо – “Танец” з оперы “Галантная Індыя”
Дж.Вердзі / Л.Басі – Канцэртная фантазія на тэмы оперы “Рыгалета”
Дж.Гершвін – Фантазія на тэмы оперы “Поргі і Бес”
Л.Андэрсан – “Fiddle-Faddle / Драбязінка”
Р.Гальяно – “Вальс Марго”
А.П’яцола – “Зіма”
і іншыя папулярныя творы
“СУЗОР’Е ТАЛЕНТАЎ”. Так называецца канцэрт, які адбудзецца 17 лютага 2023 года на сцэне Беларускай дзяржаўнай філармоніі. У гэты вечар сваё віртуознае майстэрства прадэманструюць публіцы салісты Нацыянальнага акадэмічнага народнага аркестра Рэспублікі Беларусь імя І.Жыновіча – найстарога калектыву, які на працягу шматлікіх гадоў старанна збірае пад сваім крылом самых яркіх і таленавітых выпускнікоў Беларускай дзяржаўнай акадэміі музыкі па класе народнага выканальніцтва, лаўрэатаў розных міжнародных конкурсаў.
У аркестры імя І.Жыновіча нямала яркіх музыкантаў, сапраўдных зорак сучаснага музычнага выканальніцтва. Гэта цымбалісты Ларыса Рыдлеўская, Вольга Грыгарэнка, Юлія Высоцкая, Алена Касціцына і Аксана Хахол, баяністы Дзяніс Чорны і Дзяніс Лабкоў, выканаўца на ўдарных Сяргей Шаптуноў, Мікалай Мішчанка (кларнет). Усе яны возьмуць удзел у вялікім гала-канцэрце 17 лютага.
Бліскучы феерверк віртуозных мелодый, чаргаванне разнастайных музычных нумароў, якія, як у калейдаскопе, змяняюць свае фарбы і ўзоры, моц і прыгажосць аркестравага гучання і, нарэшце, уражальная сустрэча з музыкантамі, чые імёны складаюць летапіс нацыянальнай беларускай школы ігры на народных музычных інструментах – усё гэта забяспечыць публіцы яркія, непадробленыя эмоцыі!
Дырыжор – Аляксандр Высоцкі
Вядучая канцэрта – Вольга Брылон
