Білетная каса:

+375 17 396-16-17

Замаўленне квіткоў

Музычная гасцiная

Музычная гасцёўня

Музычная гасціная – гэта ўнікальныя аўтарскія праграмы, у якіх пададзена насычаная палітра музычных жанраў: сольныя інструментальныя канцэрты, камерна-інструментальная, камерна-вакальная, сімфанічная музыка.

Заснавальніца і мастацкая кіраўніца “Музычнай гасцінай” – піяністка Таццяна Старчанка. Яна з’яўляецца не толькі выканаўцай, але і вядучай, аўтаркай праектаў і рэжысёркай-пастаноўшчыцай усіх канцэртаў.

Некалькі праграм “Музычнай гасцінай” – адзіныя ў сваім родзе і існуюць ужо на працягу больш за 15 гадоў: “Навагоднія сюрпрызы ў Музычнай гасцінай”, “Музыканты жартуюць”, “Таццянiн Дзень у Музычнай гасцінай”, “Не толькі танга…”.

Упершыню ў Беларусі “Музычнай гасцінай” былі выкананы канцэрты І.С.Баха для двух, трох і чатырох клавіраў, канцэрт В.А.Моцарта для трох клавіраў, канцэрт для аркестра “Жоўтыя зоркі” І.Шварца, канцэрты для фартэпіяна з аркестрам М.Наймана і беларускага кампазітара А.Літвіноўскага, “Антыфармалiстычны раёк” Дз.Шастаковіча (супольна з Дзяржаўным камерным хорам Рэспублікі Беларусь).

Незвычайна разнастайныя праграмы вечароў камернай музыкі – монаканцэрты М.Тарывердыева, Г.Свірыдава, В.Гаўрыліна, І.Шварца, Д.Шастаковіча, М.Глінкі, А.Шнітке, Э.Грыга, Р.Шумана, Ф.Шапэна…

У канцэртах “Музычнай гасцінай” шырока пададзена сучасная музыка: расійская, заходняя і беларуская. У 2018–2020 гг. у канцэрных праграмах калектыву гучалі творы П.Карманава, А.Айгі, З.Ахунава, Р.Шчадрына, М.Наймана, Ф.Гласа, Л.Сімаковіч, Г.Гарэлавай, А.Літвіноўскага, Дз.Лыбіна. Традыцыйным стаў канцэрт “Даўнiна і сучаснасць”, праграма якога ўлучае даўнейшую і сучасную беларускую музыку.

Мастацкі кіраўнік “Музычнай гасцінай”, піяністка Таццяна Старчанка актыўна канцэртуе па гарадах Беларусі і Расіі, выступаючы з сольнымі праграмамі. Шмат і плённа працуе з артыстамі Нацыянальнага акадэмічнага Вялікага тэатра оперы і балета Рэспублікі Беларусь: народным артыстам Беларусі Уладзімірам Пятровым, Ільём Сільчуковым, Таццянай Траццяк, Наталляй Акінінай. Яркай падзеяй заўсёды робяцца супольныя канцэрты Таццяны Старчанка з народнай артысткай Беларусі Наталляй Гайда.

З 2017 года ў “Музычнай гасцінай” пададзены яшчэ адзін жанр – “Літаратурна-музычныя канцэрты”. Гэтыя канцэрты адрадзілі даўнюю добрую традыцыю: мастацкае слова на сцэне філармоніі. Са сцэны Малой залы імя Р.Шырмы ў канцэртах гэтага цыкла паэзія і проза гучаць у выкананні актора і рэжысёра Беларускага радыё Алега Вінярскага, а музычна-паэтычныя праграмы “Сугучча” у выкананні Таццяны Старчанка.

Адменнай фарбай у “Музычнай гасцінай” стала стварэнне ансамбля “Класік-джаз трыа” і фартэпіяннага дуэта Таццяна Старчанка – Даша Мароз.

У рамках “Музычнай гасцінай” Таццянай Старчанка выпушчана дзесяць CD-дыскаў: “Руская музыка”, “Бах і Моцарт”, “Шапэн”, “Музычная гасціная” (у 2 частках), “Класік-джаз трыа” (у 2 частках), “Не толькі танга” (у 2 частках), “Зоркі Беларускай оперы на сцэне філармоніі”.

“Музычную гасціную” ведаюць і любяць па ўсёй Беларусі! Пра гэта сведчаць аншлагі на ўсіх канцэртах, газетныя і часопісныя публікацыі, выступы на дзяржаўных тэлеканалах Беларусі.

 

Мастацкая кіраўніца – Таццяна Старчанка

http://www.classical-artists.com/tanja-starchenko

Facebook: https://www.facebook.com/muzgostinaya/

Instagram: https://www.instagram.com/tatiana_starchenko_mg/

 

 

 

 

 

 

 
Дырэктар - Жанна Аляксандраўна Шуціна

muzgostinaya@philharmonic.by

Тэлефоны:

+375 17 374 48 32

+375 29 306 43 33